वामदेवबारे एकमत छौं : एमाले नवौं महाधिवेशन वैसाखमा नहुने

८ फागुन, काठमाडौं ।

 नेकपा एमाले स्थायी कमिटीको बैठकले वामदेव गौतमलाई कांग्रेस नेतृत्वको सरकारमा गृहमन्त्री बनाउने निर्णयमा अडिग रहने निर्णय गरेको छ ।

सुशील कोइराला नेतृत्वको सरकारमा उपाध्यक्ष गौतमलाई पार्टीको तर्फबाट नेतृत्व गराउने यसअघिको स्थायी कमिटीको निर्णय यथावत राख्दै स्थायी कमिटीले सात बुँदे सहमतिको अक्षरस कार्यान्वयन हुनुपर्ने अडान पुनः दोहोर्‍याएको छ ।

नयाँ बानेश्वरस्थित संविधानसभा भवनमा बसेको स्थायी कमिटीको बैठकले शनिबार बस्ने केन्द्रीय कमिटीको बैठकका लागि एजेन्डा पनि तय गरेको छ ।

उपाध्यक्ष गौतमलाई सरकारमा पठाउने विषयमा पार्टीका नेताहरुबीच मतभेद र विवाद रहेको कुरा बाहिर आएपछि स्थायी कमिटी बैठकले त्यसबारे कुनै मतभेद नभएको निष्कर्श निकालेको छ ।

‘सरकार निर्माणका लागि कांग्रेससाग भएको ७ बुादे सहमति कार्यान्वयन भएमात्र सरकारमा जाने निर्णय भएको छ’, एमाले सचिव शंकर पोखरेलले भने, ‘वामदेव गौतमलाई सरकारमा पठाउने बारेमा पार्टी भित्र कुनै मतभेद रहेको निष्कर्श पनि निकालिएको छ ।’

उपाध्यक्ष गौतमलाई गृहमन्त्री हुनबाट रोक्न पार्टीकै केही जिम्मेवार नेताहरु लागिरहेको कुरा सञ्चारमाध्यममा आइरहेका बेला स्थायी कमिटीको बैठकले गौतमलाई सरकारमा पठाउने निर्णयबारे नेताहरुले एकमत जाहेर गरेका थिए ।

पार्टीको नवौं महाधिवेशनको मिति वैसाखबाट पछि सार्ने निष्कर्श स्थायी कमिटी बैठकले निकालेको छ । एक महिनाअघि बसेको स्थायी कमिटी बैठकले वैसाख ९ बाट काठमाडौंमा नवौं महाधिवेशन गर्ने निर्णय गरेको थियो ।

शनिबार बस्ने केन्द्रीय कमिटीमा बैठकमा महाधिवेशन पार्टीका तत्कालिन महासचिव मदन भण्डारी र संगठन विभाग प्रमुख जीवराज आश्रतिको स्मृति दिवस जेठ ३ गते उद्घाटन गर्ने प्रस्ताव लाने निष्कर्श स्थायी कमिटीले निकालेको छ ।

एमालेभित्र पार्टीको नवौं महाधिवेशनअघि देशमा स्थानीय निकायको चुनाव गर्नुपर्ने आवाज सशक्त हुादै गएको छ । पहिले स्थानीय निकायको चुनाव गरेरमात्र पार्टीको महाधिवेशन गर्न कार्यकर्ताबाट पनि दबाब आएपछि महाधिवेशनको मिति पछि सार्ने निष्कर्शमा एमाले पुगेको हो ।

शनिबार बस्ने केन्द्रीय कमिटि बैठकले महाधिवेशनबारे ठोस निर्णय गर्ने बताइएको छ । एमालेले महाधिवेशनका लागि अहिलेसम्म वामदेव गौतमको संयोजकत्वमा विधान मस्यौदा समितिमात्र गठन गर्न सकेको छ । महाधिवेशन आयोजक समिति निर्माणसम्बन्धी निर्णय पनि शनिबार बस्ने केन्द्रीय कमिटि बैठकले टुंगो लाउने बताइएको छ ।