कुलो सञ्चालनमा नआउँदा कृषि उपजको लागत बढ्यो

कञ्चनपुर, १९ फागुन । कञ्चनपुरको चुरेफेदीस्थित कृष्णपुर–१ सुन्दरीफाँटामा रहेको कुलो सञ्चालनमा नआउँदा स्थानीय बासिन्दा सिँचाइ सुविधाबाट वञ्चित भएका छन् ।
चार दशकअघि सो कुलो निर्माण गरिएको थियो । १० किलोमिटर टाढाको ओदाली खोलाबाट खनेर ल्याइएको कुलो मर्मत हुन नसक्दा यहाँका बासिन्दाले सिँचाइ सुविधाबाट वञ्चित रहनु परेको हो । कुलो मर्मतका लागि आर्थिक अभाव भएकाले कुलो सञ्चालनमा ल्याउन नसकिएको स्थानीय मायाराम चौधरीले बताउनुभयो ।

“कुलो खनिएको ठाउँ भएर पूरै नदी जग्गा कटान गर्दै बग्न थालेपछि जग्गा बचाउनका लागि बाँध बाँधेर कुलो बन्द गरेका छौँ”–उहाँले भन्नुभयो । कुलो पक्की गर्न नसक्दा कुलो गहिरिएर पूरै नदी कुलोमै बग्न थालेको र सिँचाइभन्दा बालुवा र माटो ल्याएर खेत पुर्ने तथा कटान गरी जग्गा बगाउन थालेकाले कुलो नै बन्द गर्न बाध्य हुनुपरेको स्थानीय रामकुमार चौधरीले बताउनुभयो ।

“कुलो पक्की बनाउनका लागि विभिन्न सरोकारवाला संस्था र सरकारी निकायमा पुग्दासमेत सहयोग पाउन सकेका छैनौँ”–उहाँले भन्नुभयो । सिँचाइ कुलो बन्द भएपछि यहाँ बसोबास गर्दै आएका १५० परिवार मर्कामा परेका छन् भने कुलोको अभावमा पम्पसेट जडान गरी खेतमा सिँचाइको व्यवस्था गर्दै आएका छन् ।
पम्पसेट सञ्चालनका लागि इन्धनको व्यवस्था गर्नुपर्ने भएकाले कृषिउपजको लागत बढे पनि बजार मूल्य नपाउँदा समस्यामा परेको स्थानीय कृषक गयाप्रसाद चौधरीले बताउनुभयो ।

 दोमट माटो रहेको यो क्षेत्र तरकारीखेती र अन्न उत्पादनका लागि जिल्लामै अग्रणी मानिन्छ । यहाँ थारू समुदायका बासिन्दाको बसोबास रहेको छ । कुलो २०३० सालमा स्थानीय कृषकको श्रमदानमा निर्माण गरिएको थियो । झन्डै ३ सय बिघा खेतमा सिँचाइ सुविधा पु¥याउने उद्देश्यले कुलो निर्माण गरिएको थियो ।